پنجگور میں سیکیورٹی فورسز کا کامیاب آپریشن؛ فتنۃ الہندوستان کے 5 دہشتگرد ہلاک

پنجگور کے علاقے کلی سوران میں سیکیورٹی فورسز نے انٹیلی جنس معلومات کی بنیاد پر کارروائی کرتے ہوئے 5 دہشتگردوں کو ہلاک کر دیا۔

سیکیورٹی ذرائع کے مطابق ہلاک ہونے والے افراد موٹر سائیکلوں پر سوار ہو کر مبینہ طور پر کسی بڑی دہشتگرد کارروائی کی منصوبہ بندی کر رہے تھے۔ آپریشن کے دوران فورسز نے مؤثر کارروائی کرتے ہوئے انہیں نشانہ بنایا۔

ذرائع کا کہنا ہے کہ کارروائی کے بعد ہلاک دہشتگردوں کے قبضے سے اسلحہ، گولہ بارود، آئی ای ڈی ڈیوائس، دو موٹر سائیکلیں اور دیگر سامان برآمد کیا گیا، جبکہ ایک کالعدم تنظیم کا جھنڈا بھی تحویل میں لیا گیا۔

سیکیورٹی ذرائع کے مطابق ہلاک افراد پر مقامی سطح پر مبینہ طور پر بھتہ خوری، اغوا برائے تاوان، ٹارگٹ کلنگ اور دیگر تخریبی سرگرمیوں میں ملوث ہونے کا الزام تھا۔

سیکیورٹی فورسز کا کہنا ہے کہ بلوچستان میں امن و امان کے قیام اور دہشتگردی کے خاتمے کے لیے کارروائیاں جاری رہیں گی۔