بھارتی پروازوں کیلئے پاکستان کی فضائی حدود کی بندش میں مزید توسیع

اسلام آباد: پاکستان نے بھارتی پروازوں کے لیے اپنی فضائی حدود کی بندش میں مزید توسیع کردی ہے۔

پاکستان ایئرپورٹ اتھارٹی نے اس حوالے سے نیا نوٹم جاری کیا ہے، جس کے مطابق بھارت میں رجسٹرڈ تمام ایئرلائنز، لیز پر حاصل کردہ طیارے، بھارتی شہریوں کی ملکیت یا آپریٹ کیے جانے والے کمرشل اور فوجی طیاروں کے پاکستانی فضائی حدود میں داخلے پر پابندی برقرار رہے گی۔

نوٹم کے مطابق یہ پابندی 18 اگست سے 24 ستمبر کی صبح 4 بج کر 59 منٹ تک نافذ رہے گی۔

حکام کے مطابق بھارتی پروازوں کے لیے فضائی حدود کی بندش کا سلسلہ 23 اپریل 2025 سے جاری ہے اور اس حوالے سے یہ 16واں نوٹم جاری کیا گیا ہے۔