نیویارک میں پاکستان کا یومِ آزادی، تاریخ میں پہلی بار منفرد تقریب کا انعقاد

نیویارک: پاکستان کا یومِ آزادی اس سال نیویارک کے تاریخی سٹی ہال میں پہلی مرتبہ منایا گیا، جسے پاک امریکا کمیونٹی تعلقات کے حوالے سے ایک منفرد موقع قرار دیا گیا ہے۔

تقریب کا انعقاد نیویارک سٹی کونسل کی اسپیکر جولی مینین اور کونسل ممبر لِنڈا لی نے کیا، جبکہ امریکن پاکستانی ایڈووکیسی گروپ (اے پی اے جی) نے بھی تعاون کیا۔

پاکستان کے قونصل جنرل عامر احمد آتوزئی نے تقریب سے خطاب کرتے ہوئے کہا کہ سٹی ہال میں یومِ آزادی کی تقریب پاکستانی امریکی کمیونٹی کے لیے فخر اور یادگار لمحہ ہے۔

تقریب میں پاکستانی نژاد امریکی شہریوں، منتخب نمائندوں، ارکانِ پارلیمنٹ اور میڈیا سے وابستہ افراد نے شرکت کی۔ مقررین نے پاکستانی امریکی کمیونٹی کی خدمات کو سراہتے ہوئے پاک امریکا تعلقات میں اس کے کردار کو اہم قرار دیا۔