ڈاکٹر ماہ نور ناصر مزید علاج کے لیے کلیولینڈ ہسپتال ابوظہبی منتقل

کوئٹہ: ڈاکٹر ماہ نور ناصر کو مزید علاج اور طبی معائنے کے لیے متحدہ عرب امارات کے دارالحکومت ابوظہبی کے معروف کلیولینڈ ہسپتال منتقل کر دیا گیا ہے، جہاں ماہر ڈاکٹروں کی نگرانی میں ان کا علاج جاری رہے گا۔

ڈاکٹر ماہ نور ناصر کے والد حبیب اللہ ناصر نے بتایا کہ آغا خان یونیورسٹی ہسپتال کراچی سے ڈسچارج ہونے کے بعد انہیں علاج کے اگلے مرحلے کے لیے ابوظہبی منتقل کیا گیا ہے۔ انہوں نے کہا کہ ڈاکٹر ماہ نور کی صحت پہلے سے بہتر ہے اور امید ہے کہ مزید علاج سے ان کی حالت میں مزید بہتری آئے گی۔

حبیب اللہ ناصر نے وزیراعلیٰ بلوچستان میر سرفراز بگٹی اور صوبائی وزیر صحت بخت محمد کاکڑ کا شکریہ ادا کرتے ہوئے کہا کہ دونوں شخصیات نے علاج کے آغاز سے اب تک بھرپور تعاون کیا اور بہترین طبی سہولیات کی فراہمی میں اہم کردار ادا کیا۔

انہوں نے آغا خان یونیورسٹی ہسپتال کراچی کے ڈاکٹروں، نرسنگ اسٹاف اور طبی عملے کی خدمات کو بھی سراہا اور کہا کہ ان کی محنت اور بہترین علاج کے باعث ڈاکٹر ماہ نور کی صحت میں نمایاں بہتری آئی۔

حبیب اللہ ناصر نے مشکل وقت میں تعاون کرنے والے عوام، دوست احباب، سماجی و سیاسی شخصیات، ڈاکٹرز، سول سوسائٹی اور میڈیا نمائندوں کا بھی شکریہ ادا کیا۔

انہوں نے عوام سے اپیل کی کہ ڈاکٹر ماہ نور ناصر کی مکمل صحت یابی کے لیے دعاؤں کا سلسلہ جاری رکھیں تاکہ وہ جلد صحت یاب ہو کر اپنی پیشہ ورانہ ذمہ داریاں دوبارہ انجام دے سکیں۔