پنجاب میں بلدیاتی انتخابات کی جانب ایک اور قدم، حکومت سے فنڈز طلب

لاہور: پنجاب حکومت سے بلدیاتی انتخابات کے انعقاد کے لیے ساڑھے 12 ارب روپے کے فنڈز طلب کر لیے گئے ہیں۔

ذرائع پنجاب اسمبلی کے مطابق صوبائی محکمہ بلدیات نے بلدیاتی انتخابات کے انتظامات کے لیے حکومت پنجاب سے فنڈز کی درخواست کی ہے۔

ذرائع کا کہنا ہے کہ انتخابات کے لیے درکار رقم کی منظوری کا معاملہ پنجاب کابینہ کے اجلاس میں پیش کیا جائے گا، جہاں اس پر غور کیا جائے گا۔

پنجاب اسمبلی ذرائع کے مطابق صوبائی کابینہ کا اہم اجلاس طلب کر لیا گیا ہے، جس میں بلدیاتی انتخابات سمیت مختلف اہم امور اور ایجنڈا آئٹمز زیر بحث آئیں گے۔