خطے کی صورتحال؛ وزیراعظم اور فیلڈ مارشل کا اعلیٰ سطح وفد کے ساتھ دورۂ سعودی عرب

اسلام آباد: وزیراعظم محمد شہباز شریف 6 سے 8 اگست تک سعودی عرب کے سرکاری دورے پر روانہ ہوں گے، جہاں وہ اعلیٰ سطح کے وفد کے ہمراہ سعودی قیادت سے اہم ملاقاتیں کریں گے۔

دفتر خارجہ کے مطابق دورے کا مقصد پاکستان اور سعودی عرب کے دیرینہ تعلقات کو مزید مضبوط بنانا، باہمی تعاون کے فروغ اور علاقائی و عالمی امور پر تبادلہ خیال کرنا ہے۔

وزیراعظم کے ہمراہ نائب وزیراعظم و وزیر خارجہ اسحاق ڈار، فیلڈ مارشل سید عاصم منیر اور دیگر وفاقی وزرا پر مشتمل اعلیٰ سطحی وفد بھی سعودی عرب جائے گا۔

دورے کے دوران وزیراعظم شہباز شریف کی سعودی ولی عہد اور وزیراعظم شہزادہ محمد بن سلمان بن عبدالعزیز آل سعود سے ملاقات متوقع ہے، جس میں دونوں ممالک کے درمیان دوطرفہ تعلقات، اقتصادی تعاون اور باہمی دلچسپی کے معاملات پر گفتگو ہوگی۔

دفتر خارجہ کا کہنا ہے کہ پاکستان اور سعودی عرب کے تعلقات اعتماد، تعاون اور برادرانہ روابط کی طویل تاریخ پر قائم ہیں، جنہیں مزید وسعت دینے کے لیے مسلسل اقدامات کیے جا رہے ہیں۔

یہ دورہ ایسے وقت میں ہو رہا ہے جب خطے کی صورتحال میں تیزی سے تبدیلیاں آ رہی ہیں۔ توقع ہے کہ اس سے دونوں ممالک کے درمیان اسٹریٹجک تعاون مزید مضبوط ہوگا اور علاقائی و عالمی معاملات پر رابطہ کاری میں اضافہ ہوگا۔