افغان سرزمین بلوچستان میں دہشت گردی کے لیے استعمال ہو رہی ہے، وزیر داخلہ بلوچستان

کوئٹہ: صوبائی وزیر داخلہ میر ضیاء اللہ لانگو نے کہا ہے کہ افغانستان کی سرزمین بلوچستان میں دہشت گردی کی کارروائیوں کے لیے استعمال ہو رہی ہے۔

کوئٹہ میں بلوچستان تاجر اتحاد کے مرکزی صدر رحیم آغا کی قیادت میں تاجر برادری کے وفد سے مشاورتی اجلاس کے دوران وزیر داخلہ نے کہا کہ احتجاج ہر شہری کا آئینی اور جمہوری حق ہے، تاہم بے گناہ نوجوانوں اور خواتین کی ٹارگٹ کلنگ مقامی روایات کے خلاف ہے۔ انہوں نے الزام عائد کیا کہ چند شرپسند عناصر دشمن ممالک کے ایما پر صوبے کا امن خراب کرنے کی کوشش کر رہے ہیں۔

میر ضیاء اللہ لانگو نے یقین دہانی کرائی کہ تاجر برادری کے مسائل ترجیحی بنیادوں پر حل کیے جائیں گے۔ انہوں نے کہا کہ حکومت قومی شاہراہوں کی سیکیورٹی بہتر بنانے کے لیے ہنگامی اقدامات کر رہی ہے اور تاجروں سے مذاکرات کا ایک اور دور بھی کیا جائے گا۔

اجلاس میں وزیر داخلہ کے معاونِ خصوصی بابر یوسفزئی اور ڈپٹی کمشنر کوئٹہ بھی موجود تھے۔

اس موقع پر بلوچستان تاجر اتحاد کے مرکزی صدر رحیم آغا نے قومی شاہراہوں پر ٹرک نذرِ آتش کیے جانے، سیکیورٹی صورتحال اور میٹروپولیٹن کارپوریشن سے متعلق مسائل پر تحفظات کا اظہار کرتے ہوئے حکومت سے فوری اقدامات کا مطالبہ کیا۔