عالمی منڈی میں خام تیل کی قیمتوں میں بڑی کمی، ایک روز میں 4 ڈالر سے زائد سستا ہوگیا

مشرق وسطیٰ میں کشیدگی کم ہونے کے امکانات کے باعث عالمی مارکیٹ میں خام تیل کی قیمتوں میں نمایاں کمی ریکارڈ کی گئی ہے۔

امریکا اور ایران کے درمیان صورتحال میں بہتری کے اشاروں اور ممکنہ فوجی کارروائی مؤخر ہونے کی خبروں کے بعد سرمایہ کاروں کے خدشات کم ہوئے، جس کے نتیجے میں تیل کی قیمتیں نیچے آگئیں۔

عالمی منڈی میں برینٹ خام تیل کی قیمت 4.08 ڈالر فی بیرل کمی کے بعد 83.85 ڈالر پر آگئی، جبکہ امریکی خام تیل ویسٹ ٹیکساس انٹرمیڈیٹ (WTI) 4.01 ڈالر سستا ہو کر 80.66 ڈالر فی بیرل پر ٹریڈ کرتا رہا۔

ماہرین کے مطابق خطے میں کشیدگی میں کمی کے باعث تیل کی سپلائی متاثر ہونے کے خدشات کم ہوئے ہیں، جس سے عالمی مارکیٹ میں قیمتوں پر دباؤ آیا۔

واضح رہے کہ گزشتہ عرصے میں مشرق وسطیٰ میں بڑھتی ہوئی کشیدگی اور تیل کی ترسیل سے متعلق خدشات کے باعث عالمی سطح پر خام تیل کی قیمتوں میں تیزی دیکھی گئی تھی۔