آزاد کشمیر میں حکومت سازی کے لیے مسلم لیگ ن کو سادہ اکثریت حاصل ہوگئی، رانا ثنا

اسلام آباد: وزیراعظم کے مشیر رانا ثنا اللہ نے دعویٰ کیا ہے کہ آزاد کشمیر کے انتخابات میں پاکستان مسلم لیگ (ن) حکومت سازی کے لیے سادہ اکثریت حاصل کر چکی ہے۔

وفاقی وزیر برائے امور کشمیر و گلگت بلتستان امیر مقام کے ہمراہ پریس کانفرنس کرتے ہوئے رانا ثنا اللہ نے کہا کہ 45 نشستوں میں سے مسلم لیگ (ن) 23 پر کامیابی حاصل کر چکی ہے۔ انہوں نے بتایا کہ 10 اگست کو انتخابات کے تیسرے مرحلے کے بعد پارلیمانی کمیٹی کا اجلاس طلب کیا جائے گا۔

ان کے مطابق دوسرے مرحلے میں ہونے والے انتخابات کی 20 نشستوں میں سے مسلم لیگ (ن) نے 13، جبکہ پاکستان پیپلز پارٹی نے 3 نشستوں پر کامیابی حاصل کی۔ انہوں نے یہ بھی کہا کہ مظفرآباد کی چاروں نشستیں مسلم لیگ (ن) نے جیتیں، جبکہ 12 مہاجر نشستوں میں سے 10 پر بھی ن لیگ کامیاب رہی۔

رانا ثنا اللہ نے کہا کہ کشمیر کے عوام نے نواز شریف کے وژن پر اعتماد کا اظہار کیا ہے اور مسلم لیگ (ن) عوامی مینڈیٹ کے مطابق حکومت تشکیل دے کر اپنے وعدے پورے کرے گی۔

انہوں نے پریس کانفرنس کے دوران پیپلز پارٹی پر مظفرآباد میں ہنگامہ آرائی اور انتخابی عمل متاثر کرنے کے الزامات بھی عائد کیے۔ ان کا کہنا تھا کہ ایک شخص کی ہلاکت سے شہر میں خوف و ہراس پھیلا، جس کے باعث ووٹنگ ٹرن آؤٹ متاثر ہوا۔ انہوں نے چودھری لطیف اکبر پر قاتلانہ حملے کے دعوے کو بھی مسترد کرتے ہوئے اسے “ڈرامہ” قرار دیا۔