جنرل سید عامر رضا کو نشانِ امتیاز (ملٹری) دینے کی منظوری

جنرل سید عامر رضا کو نشانِ امتیاز (ملٹری) دینے کی منظوری

اسلام آباد: صدر مملکت آصف علی زرداری نے کمانڈر نیشنل اسٹریٹجک کمانڈ جنرل سید عامر رضا کو اعلیٰ عسکری اعزاز نشانِ امتیاز (ملٹری) عطا کرنے کی منظوری دے دی۔

سرکاری ذرائع کے مطابق یہ اعزاز جنرل سید عامر رضا کی قومی دفاع اور پیشہ ورانہ خدمات کے اعتراف میں دیا جا رہا ہے۔ جنرل سید عامر رضا نے حال ہی میں ملک کے پہلے کمانڈر نیشنل اسٹریٹجک کمانڈ کی حیثیت سے ذمہ داریاں سنبھالی ہیں۔

ذمہ داریاں سنبھالنے کے موقع پر جنرل ہیڈکوارٹرز (جی ایچ کیو) میں انہیں گارڈ آف آنر پیش کیا گیا، جبکہ انہوں نے یادگارِ شہداء پر حاضری دے کر پھولوں کی چادر چڑھائی اور شہداء کو خراج عقیدت پیش کیا۔

اس سے قبل 24 جولائی کو وزیراعظم شہباز شریف نے جنرل سید عامر رضا کو فور اسٹار جنرل کے عہدے پر ترقی دیتے ہوئے کمانڈر نیشنل اسٹریٹجک کمانڈ مقرر کیا تھا۔ بعد ازاں انہوں نے چیف آف ڈیفنس فورسز اور چیف آف آرمی اسٹاف فیلڈ مارشل عاصم منیر سے بھی ملاقات کی۔

واضح رہے کہ 27ویں آئینی ترمیم کے تحت کمانڈر نیشنل اسٹریٹجک کمانڈ کا نیا عہدہ متعارف کرایا گیا، جبکہ سابق چیئرمین جوائنٹ چیفس آف اسٹاف کمیٹی کے عہدے کی جگہ چیف آف ڈیفنس فورسز اور کمانڈر نیشنل اسٹریٹجک کمانڈ کے نئے عہدے قائم کیے گئے۔

آئینی ترمیم کے مطابق وزیراعظم، چیف آف ڈیفنس فورسز کی سفارش پر کمانڈر نیشنل اسٹریٹجک کمانڈ کی تقرری کریں گے۔ عہدے کی ابتدائی مدت تین سال ہوگی، جس میں سفارش کی صورت میں مزید توسیع دی جا سکتی ہے۔