3 روز میں تیل کی عالمی قیمتوں میں 12 فیصد کمی، پاکستانی تاحال ریلیف سے محروم

اسلام آباد: عالمی مارکیٹ میں گزشتہ تین روز کے دوران خام تیل کی قیمتوں میں تقریباً 12 فیصد کمی ریکارڈ کی گئی، تاہم پاکستان میں پیٹرولیم مصنوعات کی قیمتوں میں اس کمی کا فائدہ تاحال عوام کو نہیں مل سکا۔

اعداد و شمار کے مطابق صرف گزشتہ 12 روز کے دوران ڈیزل کی قیمت میں 65 روپے 8 پیسے جبکہ پیٹرول کی قیمت میں 25 روپے 1 پیسہ اضافہ ہو چکا ہے۔

17 جولائی کو ڈیزل کی فی لیٹر قیمت 323 روپے 3 پیسے اور پیٹرول 310 روپے 71 پیسے تھا۔ اسی روز وفاقی حکومت نے پیٹرولیم مصنوعات کی قیمتوں کا روزانہ کی بنیاد پر تعین کرنے کا نظام متعارف کرایا تھا۔

29 جولائی تک پیٹرول کی قیمت بڑھ کر 335 روپے 81 پیسے فی لیٹر جبکہ ڈیزل 388 روپے 38 پیسے فی لیٹر تک پہنچ چکا ہے۔

اس عرصے کے دوران پیٹرول کی قیمت میں صرف دو مرتبہ معمولی کمی کی گئی، جن میں 21 جولائی کو 35 پیسے اور 27 جولائی کو ایک روپے فی لیٹر کمی شامل ہے، جبکہ ڈیزل کی قیمت میں 17 جولائی کے بعد کوئی کمی نہیں کی گئی۔

رپورٹس کے مطابق 25 سے 28 جولائی کے درمیان عالمی مارکیٹ میں خام تیل کی قیمتوں میں نمایاں کمی آئی اور صرف تین روز میں تقریباً 12 فیصد گراوٹ ریکارڈ کی گئی، تاہم اس کا فائدہ اب تک ملکی صارفین کو منتقل نہیں کیا گیا، جس پر عوام کی جانب سے تشویش کا اظہار کیا جا رہا ہے۔