گنداخہ: مدرسہ جامعہ اسلامیہ دارالعلوم میں زمینداروں کا نہری پانی کی کمی اور بھل صفائی کے حوالے سے اہم اجلاس

گنداخہ (نورحسن جمالی) – مدرسہ جامعہ اسلامیہ دارالعلوم علی المرتضیٰ گنداخہ میں زمینداروں کی گنداخہ شاخ میں نہری پانی کی شدید کمی اور بھل صفائی نہ ہونے کے حوالے سے ایک اہم میٹنگ منعقد ہوئی۔

اجلاس جمعیت علماء اسلام تحصیل گنداخہ کے امیر مولانا امان اللہ حقانی کی زیرِ صدارت منعقد ہوا، جبکہ اجلاس کی نگرانی سائیں بھورل شاہ نے کی۔

میٹنگ میں سابق وائس چیئرمین میونسپل کمیٹی گنداخہ میر شیراز خان جمالی، پیپلز پارٹی کے جنرل سیکرٹری ڈاکٹر قدرت اللہ جمالی، گلاب خان، محمد امین جمالی، فرالدین جمالی، محمد رحیم جتک، استاد لعل محمد جمالی، استاد کپتان علی جمالی، رئیس در محمد خان جمالی سمیت علاقے کے دیگر زمینداران کی بڑی تعداد نے شرکت کی۔

اجلاس میں شرکاء نے گنداخہ شاخ میں پانی کی قلت اور نہروں میں بھل صفائی نہ ہونے پر شدید تشویش کا اظہار کرتے ہوئے کہا کہ پانی کی کمی کے باعث زمینداروں کی فصلیں تباہ ہو رہی ہیں اور کسان معاشی بدحالی کا شکار ہیں۔

شرکاء نے محکمہ ایریگیشن کے اعلیٰ حکام سے مطالبہ کیا کہ گنداخہ شاخ میں پانی کی منصفانہ تقسیم کو یقینی بنایا جائے اور فوری طور پر بھل صفائی کا کام شروع کر کے زمینداروں کی مشکلات کو حل کیا جائے۔

اجلاس کے اختتام پر مولانا امان اللہ حقانی کی جانب سے آنے والے مہمانوں کے اعزاز میں پرتکلف عصرانہ کا اہتمام بھی کیا گیا۔