عالمی منڈی میں خام تیل سستا، مگر پاکستان میں پیٹرول مہنگا؟

ایران اور امریکا کے درمیان کشیدگی کے بعد عالمی منڈی میں خام تیل کی قیمتوں میں اضافے کے پیش نظر پاکستان میں بھی پیٹرولیم مصنوعات کی قیمتوں میں نمایاں اضافہ کیا گیا ہے۔

اسی دوران وفاقی حکومت نے پیٹرولیم مصنوعات کی قیمتیں 15 روزہ کی بنیاد پر مقرر کرنے کے بجائے پہلے ہفتہ وار اور پھر روزانہ کی بنیاد پر طے کرنے کا نیا نظام متعارف کراتے ہوئے مؤقف اختیار کیا کہ عالمی منڈی میں قیمتوں میں جس رفتار سے ردوبدل ہوگا، اسی تناسب سے عوام کو بھی ریلیف یا اضافی بوجھ منتقل کیا جائے گا۔

حکومتی فیصلے کے بعد ابتدا میں پیٹرول کی قیمت میں 5 روپے جبکہ ہائی اسپیڈ ڈیزل کی قیمت میں 31 روپے فی لیٹر اضافہ کیا گیا۔ بعد ازاں 21 جولائی کو پیٹرول کی قیمت میں صرف 35 پیسے فی لیٹر کمی کی گئی، پھر مختلف اوقات میں دوبارہ 6 روپے اور 4 روپے فی لیٹر اضافے کیے گئے۔

27 جولائی کو پہلی مرتبہ پیٹرول کی قیمت میں صرف ایک روپے فی لیٹر کمی کی گئی، جبکہ اسی روز ڈیزل کی قیمت میں 3 روپے 37 پیسے فی لیٹر اضافہ کر دیا گیا۔ اس عرصے کے دوران اوگرا نے مجموعی طور پر صرف ایک روپے 35 پیسے فی لیٹر ریلیف دیا، جبکہ پیٹرول کی قیمت میں تقریباً 20 روپے فی لیٹر اضافہ کیا جا چکا تھا۔

اس کے بعد بھی گزشتہ روز اوگرا کی جانب سے جاری نوٹیفکیشن میں پیٹرول مزید ایک روپے 63 پیسے فی لیٹر مہنگا کر دیا گیا۔

حکومت نے روزانہ قیمتوں کے تعین کا نظام متعارف کراتے وقت مؤقف اختیار کیا تھا کہ عالمی منڈی میں خام تیل مہنگا ہوگا تو پاکستان میں بھی قیمتیں بڑھیں گی اور اگر عالمی منڈی میں کمی آئے گی تو عوام کو فوری ریلیف دیا جائے گا۔

تاہم اس وقت عالمی منڈی میں خام تیل تقریباً 87 ڈالر فی بیرل تک پہنچنے کے بعد دوبارہ کم ہو کر تقریباً 80 ڈالر فی بیرل کی سطح پر آ چکا ہے، لیکن اس کمی کا خاطر خواہ فائدہ صارفین کو نہیں دیا گیا۔ یہی وجہ ہے کہ عوام اور ماہرین معاشیات حکومتی پالیسی پر سوالات اٹھا رہے ہیں۔

معاشی ماہر ڈاکٹر بشارت حسن سمجھتے ہیں کہ عالمی منڈی میں خام تیل کی قیمتوں میں تقریباً 12 فیصد کمی کے بعد اسی تناسب سے عوام کو بھی ریلیف ملنا چاہیے تھا۔

ان کے مطابق حکومت نے روزانہ قیمتوں کے تعین کا نظام اسی وعدے کے ساتھ متعارف کرایا تھا کہ عالمی مارکیٹ میں کمی بیشی کا اثر فوری طور پر عوام تک منتقل کیا جائے گا، لیکن عملی طور پر اضافہ تو فوری کیا جاتا ہے جبکہ کمی نہ ہونے کے برابر دی جاتی ہے۔

ڈاکٹر بشارت حسن کے مطابق اس وقت پیٹرول کی فی لیٹر قیمت میں تقریباً 126 روپے مختلف ٹیکسوں، لیویز اور مارجنز کی مد میں شامل ہیں۔