کالعدم ایکشن کمیٹی کے غیر مسلح ہونے کے دعوے آشکار، گرفتار کارندے کے ہوشربا انکشافات

ویب ڈیسک: کالعدم ایکشن کمیٹی کے غیر مسلح ہونے کے دعوؤں پر سوالات اٹھ گئے، جبکہ گرفتار کارندے زوہیب خالد نے دوران تفتیش مبینہ طور پر اہم انکشافات کیے ہیں۔

ذرائع کے مطابق ایک ویڈیو میں کالعدم تنظیم کے مسلح عناصر کو مختلف ہتھیاروں کے ساتھ دیکھا جا سکتا ہے۔ حکام کا کہنا ہے کہ تنظیم کے مسلح کارکن مبینہ طور پر علاقے میں بدامنی پھیلانے اور سیکیورٹی فورسز سمیت شہریوں کو نشانہ بنانے میں ملوث رہے ہیں۔

رپورٹس کے مطابق کالعدم ایکشن کمیٹی کے کارندوں کی فائرنگ سے زخمی ہونے والے سپاہی علی عباس کو اسپتال منتقل کیا گیا، جبکہ کارروائی کے دوران مبینہ طور پر مسلح کارندے زوہیب خالد کو گرفتار کیا گیا۔

حکام کے مطابق گرفتار ملزم کے قبضے سے امریکی ساختہ ایم فور رائفل برآمد کی گئی، جبکہ دوران تفتیش تنظیم کی جانب سے جدید ہتھیاروں کی فراہمی اور کارروائیوں سے متعلق معلومات سامنے آئیں۔

گرفتار ملزم نے مبینہ طور پر دعویٰ کیا کہ تنظیم کی جانب سے سیکیورٹی اہلکار کو نشانہ بنانے پر انعامی رقم مقرر کی گئی تھی۔ سیکیورٹی حکام کا کہنا ہے کہ ویڈیو شواہد اور گرفتار ملزم کے بیانات سے تنظیم کے غیر مسلح ہونے کے دعوے کی حقیقت سامنے آگئی ہے۔