لیفٹیننٹ جنرل عامر رضا کی فور اسٹار جنرل کے عہدے پر ترقی، کمانڈر نیشنل اسٹریٹجک کمانڈ مقرر کردیا گیا

اسلام آباد: وزیراعظم شہباز شریف نے پاکستان آرمی کے چیف آف جنرل اسٹاف لیفٹیننٹ جنرل عامر رضا، ہلالِ امتیاز (ملٹری)، ستارۂ بسالت کو فور اسٹار جنرل کے عہدے پر ترقی دے کر کمانڈر نیشنل اسٹریٹجک کمانڈ تعینات کر دیا ہے۔

وزیراعظم آفس سے جاری بیان کے مطابق وزیراعظم نے جنرل عامر رضا کو نئی ذمہ داری سنبھالنے پر مبارکباد دیتے ہوئے ان کے لیے نیک تمناؤں کا اظہار کیا۔ انہوں نے امید ظاہر کی کہ جنرل عامر رضا قومی سلامتی سے متعلق اس اہم منصب کی ذمہ داریاں پیشہ ورانہ مہارت، عزم اور قومی مفاد کو مقدم رکھتے ہوئے انجام دیں گے۔

بیان میں کہا گیا ہے کہ کمانڈر نیشنل اسٹریٹجک کمانڈ کا منصب ملک کی اسٹریٹجک صلاحیتوں اور دفاعی حکمت عملی کے حوالے سے انتہائی اہمیت کا حامل ہے۔

حکومتی اعلامیے کے مطابق جنرل عامر رضا کی فور اسٹار جنرل کے عہدے پر ترقی کو پاکستان کی عسکری قیادت میں ایک اہم پیش رفت قرار دیا جا رہا ہے۔