آئی جی آزاد کشمیر کا تشدد میں ملوث عناصر سے مذاکرات سے صاف انکار

مظفرآباد: انسپکٹر جنرل (آئی جی) آزاد جموں و کشمیر پولیس لیاقت علی ملک نے پرتشدد اور ریاست مخالف عناصر سے مذاکرات کے مطالبات کو مسترد کرتے ہوئے کہا ہے کہ معصوم شہریوں اور پولیس اہلکاروں پر حملے کرنے والوں کے ساتھ کسی قسم کی نرمی نہیں برتی جائے گی۔

آئی جی لیاقت علی ملک نے اپنے بیان میں کہا کہ پولیس اہلکاروں کو بے دردی سے شہید کرنے اور ان کی لاشوں کی بے حرمتی کرنے والے عناصر کے ساتھ مذاکرات کا کوئی جواز نہیں۔ ان کا کہنا تھا کہ “کیا کوئی اپنے بھائی کے قاتلوں کے ساتھ مذاکرات کی میز پر بیٹھنے کا تصور بھی کر سکتا ہے؟”

انہوں نے واضح کیا کہ پولیس کا کام سیاسی مسائل کا حل نکالنا نہیں بلکہ قانون پر عمل درآمد یقینی بنانا ہے، جبکہ سیاسی حل منتخب سیاسی قیادت کے ذریعے ہی ممکن ہوتا ہے۔

آئی جی آزاد کشمیر نے کہا کہ شرپسند عناصر سیکیورٹی فورسز کو دھمکیاں دینے کے ساتھ ساتھ عام شہریوں کو بھی نشانہ بنا رہے ہیں۔ انہوں نے الزام عائد کیا کہ ایک بے گناہ شہری، جو اپنی والدہ کے جنازے میں شرکت کے لیے جا رہا تھا، اسے اغوا کرکے تشدد کا نشانہ بنایا گیا۔

انہوں نے اس عزم کا اظہار کیا کہ معصوم شہریوں پر تشدد اور دہشت پھیلانے میں ملوث عناصر کے خلاف ریاست پوری قوت کے ساتھ کارروائی کرے گی اور قانون کی عملداری ہر صورت یقینی بنائی جائے گی۔