زیارت شہداء سے اظہارِ یکجہتی، کوئٹہ میں وکلاء کی احتجاجی ریلی

کوئٹہ: سانحہ زیارت کے شہداء سے اظہارِ یکجہتی اور دہشت گردی کے خلاف احتجاج کے لیے بلوچستان بار کونسل اور کوئٹہ بار ایسوسی ایشن کی قیادت میں وکلاء نے احتجاجی ریلی نکالی۔

ریلی ضلعی کچہری سے شروع ہوئی، جس میں مرد و خواتین وکلاء نے بڑی تعداد میں شرکت کی۔ شرکاء نے مختلف شاہراہوں سے مارچ کرتے ہوئے دھرنا گاہ پہنچ کر شہداء کے لواحقین سے اظہارِ یکجہتی کیا۔

احتجاج کے دوران وکلاء نے دہشت گردی کے خلاف اور شہداء کے اہلِ خانہ کے حق میں نعرے بازی کی۔ شرکاء کا کہنا تھا کہ دہشت گردی کے واقعات ناقابلِ برداشت ہیں اور بے گناہ شہریوں کا تحفظ ریاست کی اولین ذمہ داری ہے۔

وکلاء نے حکومت سے مطالبہ کیا کہ دہشت گردی کے خاتمے، امن و امان کے قیام اور شہریوں کے جان و مال کے تحفظ کے لیے مؤثر اور فوری اقدامات کیے جائیں، جبکہ دہشت گردی میں ملوث عناصر کو قانون کے مطابق سخت سزا دی جائے۔