قلات ڈویژن کو بڑا جھٹکا، مستونگ کو چھین کر کوئٹہ میں شامل کر دیا گیا، بلوچستان میں نئی سرحدیں قائم

کوئٹہ: حکومت بلوچستان نے صوبائی دارالحکومت کوئٹہ کی انتظامی تقسیم کا باقاعدہ نوٹیفکیشن جاری کر دیا ہے، جس کے تحت ضلع کوئٹہ کو دو نئے اضلاع، کوئٹہ ایسٹ اور کوئٹہ ویسٹ میں تقسیم کر دیا گیا ہے۔

جاری کردہ نوٹیفکیشن کے مطابق کوئٹہ ڈویژن اب تین اضلاع پر مشتمل ہوگا، جن میں کوئٹہ ایسٹ، کوئٹہ ویسٹ اور مستونگ شامل ہیں۔

نوٹیفکیشن کے مطابق ضلع کوئٹہ ایسٹ میں سریاب، صدر اور سٹی سب ڈویژنز شامل کیے گئے ہیں، جبکہ ضلع کوئٹہ ویسٹ میں کچلاک، بروری اور پنجپائی سب ڈویژنز کو شامل کیا گیا ہے۔

حکومت بلوچستان نے ایک اور اہم انتظامی فیصلہ کرتے ہوئے ضلع مستونگ کو قلات ڈویژن سے علیحدہ کرکے کوئٹہ ڈویژن میں شامل کر دیا ہے۔

حکومتی ذرائع کے مطابق اس انتظامی تقسیم کا مقصد عوام کو بہتر طرزِ حکمرانی، مؤثر انتظامی سہولیات اور سرکاری خدمات کی بروقت فراہمی یقینی بنانا ہے۔ نئے انتظامی ڈھانچے سے ترقیاتی منصوبوں پر عملدرآمد اور ضلعی سطح پر عوامی مسائل کے حل میں بھی بہتری آنے کی توقع ہے۔