کمسن طلبہ پر دھماکہ انسانیت سوز واقعہ ہے، جے یو آئی اوستا محمد

گنداخہ:( نامہ نگار فرید احمد) جمعیت علمائے اسلام ضلع اوستا محمد کے امیر صوفی خاوند بخش چنہ جنرل کونسلر میر نعیم خان عمرانی و دیگر کابینہ اراکین نے جامعہ امدادیہ سریاب روڈ کے کمسن طلبہ پر بارودی مواد کے دھماکے کی شدید الفاظ میں مذمت کرتے ہوئے اسے نہایت افسوسناک سفاکانہ اور انسانیت سوز واقعہ قرار دیاانہوں نے معصوم طلبہ کی شہادت پر گہرے رنج و غم کا اظہار کرتے ہوئے شہداء کے لواحقین سے دلی تعزیت اور زخمیوں کی جلد و مکمل صحت یابی کے لیے دعا کی،انہوں نے کہا کہ معصوم اور بے گناہ طلبہ کو نشانہ بنانے والے عناصر انسانیت کے کھلے دشمن ہیں جنہوں نے اپنی درندگی سے یہ ثابت کردیا ہے کہ انہیں نہ دین کا احترام ہے نہ انسانیت کا اور نہ ہی بچوں کی جانوں کا کوئی احساس انہوں نے کہا کہ بلوچستان بالخصوص کوئٹہ مسلسل بدامنی، دہشت گردی اور خونریزی کی لپیٹ میں ہےعوام، تاجر، طلبہ، علماء اور زندگی کے ہر شعبے سے تعلق رکھنے والے شہری عدم تحفظ کا شکار ہیں۔ شہر میں امن و امان کی بگڑتی ہوئی صورتحال نے شہریوں کو شدید خوف و ہراس میں مبتلا کردیا ہے لوگ عملاً قاتلوں دہشت گردوں، غنڈہ عناصر اور راہزنوں کے رحم و کرم پر چھوڑ دیے گئے ہیں۔انہوں نے کہا کہ حکومت کی اولین ذمہ داری شہریوں کے جان و مال کا تحفظ اور امن و امان کا قیام ہے مگر افسوس کہ عملی اقدامات کے بجائے محض بلند و بانگ دعوؤں اور نمائشی بیانات سے عوام کو مطمئن کرنے کی کوشش کی جا رہی ہے جبکہ زمینی حقائق اس کے برعکس ہیں۔ انہوں نے مطالبہ کیا کہ جامعہ امدادیہ کے المناک واقعے کے ذمہ دار عناصر کو فوری طور پر گرفتار کرکے قانون کے مطابق قرار واقعی سزا دی جائے مدارس تعلیمی اداروں اور عوامی مقامات کی سیکیورٹی کو مؤثر بنایا جائے۔