وزیر اعلیٰ خیبر پختونخوا کے معاون خصوصی برائے خوراک ڈاکٹر محمد اسرار خان کا چارسدہ کا دورہ

وزیر اعلیٰ خیبر پختونخوا کے معاون خصوصی برائے خوراک ڈاکٹر محمد اسرار خان کا چارسدہ کا دورہ

اس موقع پر انہوں نے نئے زیر تعمیر سرکاری گندم گودام کا دورہ کیا اور تعمیراتی کام کے معیار کا تفصیلی جائزہ لیا۔

پشاور(نمائندہ خصوصی)گلوبل ٹائمز میڈیا یورپ کے مطابق وزیراعلیٰ خیبرپختونخوا کے معاونِ خصوصی برائے خوراک ڈاکٹر محمد اسرار خان نے چارسدہ میں زیرِ تعمیر سرکاری گندم گودام کا دورہ کیا۔ اس موقع پر محکمہ خوراک اور دیگر متعلقہ افسران نے انہیں منصوبے کی تعمیراتی پیش رفت، گودام کی گنجائش اور دیگر تکنیکی امور پر تفصیلی بریفنگ دی۔دورے کے دوران معاونِ خصوصی نے زیرِ تعمیر گودام میں جاری تعمیراتی کام کے معیار، رفتار اور مجموعی پیش رفت کا تفصیلی جائزہ لیا۔ انہوں نے متعلقہ حکام کو ہدایت کی کہ منصوبے پر تمام تعمیراتی کام مقررہ مدت کے اندر ہر صورت مکمل کیے جائیں اور تعمیر کے ہر مرحلے میں معیار پر کسی قسم کا سمجھوتہ نہ کیا جائے۔ڈاکٹر محمد اسرار خان نے کہا کہ صوبائی حکومت سرکاری گندم کے محفوظ ذخیرے کو یقینی بنانے اور جدید، معیاری گوداموں کی تعمیر کے لیے عملی اقدامات کر رہی ہے تاکہ گندم کے ذخائر کو محفوظ رکھا جا سکے اور خوراک کے مؤثر انتظام کو مزید بہتر بنایا جا سکے۔انہوں نے کہا کہ وزیراعلیٰ خیبرپختونخوا سہیل خان آفریدی کی ہدایات کے مطابق محکمہ خوراک کی استعدادِ کار میں مسلسل اضافہ کیا جا رہا ہے تاکہ عوام کو معیاری گندم اور آٹے کی بروقت اور بہتر فراہمی یقینی بنائی جا سکے۔ انہوں نے متعلقہ افسران پر زور دیا کہ منصوبے کی بروقت تکمیل کے ساتھ ساتھ تعمیراتی معیار اور شفافیت کو بھی ہر قیمت پر برقرار رکھا جائے۔