کوئٹہ: دشت میں راستہ بھٹکنے والے خاندان کی گاڑی پر فائرنگ، ایک شخص جاں بحق، خاتون شدید زخمی

کوئٹہ: کراچی سے کوئٹہ آنے والا ایک خاندان مبینہ طور پر گوگل میپ کی غلط رہنمائی کے باعث دشت کے علاقے کھنڈ پہنچ گیا، جہاں نامعلوم مسلح افراد نے ان کی گاڑی پر اندھا دھند فائرنگ کر دی۔

ذرائع کے مطابق فائرنگ کا نشانہ بننے والا خاندان کراچی کے علاقے ناظم آباد کا رہائشی تھا۔ حملے کے نتیجے میں خاندان کے سربراہ علی جمیل موقع پر جاں بحق ہوگئے، جبکہ ایک خاتون شدید زخمی ہوئیں۔

گاڑی میں موجود دو کمسن بچے معجزانہ طور پر محفوظ رہے۔ زخمی خاتون کو فوری طور پر طبی امداد کے لیے اسپتال منتقل کر دیا گیا۔

واقعے کے بعد قانون نافذ کرنے والے اداروں نے علاقے میں تحقیقات کا آغاز کر دیا ہے، تاہم اس واقعے کے حوالے سے تاحال کسی سرکاری ادارے کی جانب سے باضابطہ بیان جاری نہیں کیا گیا۔