یومِ عاشور ہمیں حق، صبر اور استقامت کا درس دیتا ہے، وزیراعلیٰ بلوچستان سرفراز بگٹی

کوئٹہ: وزیراعلیٰ بلوچستان میر سرفراز بگٹی نے 10 محرم الحرام یومِ عاشور کے موقع پر اپنے پیغام میں کہا ہے کہ حضرت امام حسینؓ اور شہدائے کربلا کی عظیم قربانی حق، صداقت، صبر اور استقامت کی لازوال علامت ہے۔

انہوں نے کہا کہ یومِ عاشور ہمیں ظلم کے خلاف ڈٹ جانے، انصاف کے قیام اور حق کی سربلندی کے لیے جدوجہد کا درس دیتا ہے۔ 10 محرم الحرام کا پیغام اتحاد، اخوت، برداشت اور ایثار کے جذبے کو فروغ دینا ہے۔

وزیراعلیٰ بلوچستان نے کہا کہ ہمیں اپنی اجتماعی زندگی میں حسینی کردار کو اپنانا ہوگا اور حضرت امام حسینؓ کی تعلیمات کی روشنی میں امن، بھائی چارے اور رواداری کو فروغ دینا ہوگا۔

انہوں نے کہا کہ حکومت بلوچستان نے یومِ عاشور کے موقع پر امن و امان کے قیام، عزاداروں کے تحفظ اور جلوسوں و مجالس کے پرامن انعقاد کے لیے جامع اور مؤثر انتظامات کیے ہیں۔

میر سرفراز بگٹی نے کہا کہ علمائے کرام، امن کمیٹیوں، قانون نافذ کرنے والے اداروں اور عوام کے باہمی تعاون سے صوبے بھر میں محرم الحرام کے دوران مثالی ہم آہنگی قائم ہے، جو قابلِ تحسین ہے۔

انہوں نے عوام سے اپیل کی کہ یومِ عاشور کے موقع پر حضرت امام حسینؓ کی تعلیمات کو اپنی زندگی کا حصہ بناتے ہوئے امن، بھائی چارے، رواداری اور قومی یکجہتی کے فروغ کے لیے اپنا کردار ادا کریں۔