نیشنل بنک کے صدر کا تقرر بلوچستان سے کیا جائے،محمد زمان خان ملاخیل

نیشنل بینک کے اگلے صدر کے عہدے کے لیے صوبے سے کسی قابل اور مستند ماہر بینکر کا تقرر کیا جائے۔نیشنل بینک ٹریڈ یونین فیڈریشن

دانش اسکولوں کا قیام اور دیگر اہم ترقیاتی منصوبے وزیر اعظم کے بلوچستان کی ترقی اور فلاح و بہبود کے عزم کا منہ بولتا ثبوت ہیں

​کوئٹہ (سٹاف رپورٹر)
نیشنل بینک ٹریڈ یونین فیڈریشن کے سیکرٹری جنرل محمد زمان خان ملاخیل نے وزیر اعظم شہباز شریف کی جانب سے بلوچستان کو نیشنل فنانس کمیشن (این ایف سی) کے شیئر سے مستثنیٰ قرار دینے کے اقدام کو سراہتے ہوئے کہا ہے کہ وزیر اعظم نے صوبے میں پائے جانے والے احساسِ محرومی کو دور کرنے کے لیے ہمیشہ عملی اقدامات کیے ہیں۔
​ان خیالات کا اظہار انہوں نے کوئٹہ میں ایک پریس کانفرنس کے دوران کیا۔ محمد زمان خان ملاخیل نے مزید کہا کہ صوبے میں دانش اسکولوں کا قیام اور دیگر اہم ترقیاتی منصوبے وزیر اعظم کے بلوچستان کی ترقی اور فلاح و بہبود کے عزم کا منہ بولتا ثبوت ہیں۔
​صدر نیشنل بینک کے لیے نامزدگی کا مطالبہ
فیڈریشن کے سیکرٹری جنرل نے وزیر اعظم سے پرزور مطالبہ کیا کہ وہ بلوچستان کے مسائل حل کرنے کی روایت کو برقرار رکھتے ہوئے نیشنل بینک کے اگلے صدر کے عہدے کے لیے صوبے سے کسی قابل اور مستند ماہر بینکاری کا تقرر کریں۔ انہوں نے نشاندہی کی کہ نیشنل بینک کے قیام سے اب تک بلوچستان سے کوئی بھی فرد صدر کے عہدے پر فائز نہیں ہوا، حالانکہ صوبے میں اعلیٰ تعلیم یافتہ اور باصلاحیت بینکرز کی ایک بڑی تعداد موجود ہے جنہوں نے اپنی کارکردگی سے ادارے کا نام روشن کیا ہے۔
​وفد کی وزیر اعلیٰ اور چیمبر آف کامرس کے عہدیداران سے ملاقات کا فیصلہ
محمد زمان خان ملاخیل نے کہا کہ نیشنل بینک ٹریڈ یونین فیڈریشن کا ایک وفد جلد ہی وزیر اعلیٰ بلوچستان اور صدر چیمبر آف کامرس سے ملاقات کرے گا۔ ملاقات میں بینکنگ سیکٹر کے امور، صوبے کے مسائل اور دیگر اہم معاملات پر تفصیلی تبادلہ خیال کیا جائے گا۔ انہوں نے امید ظاہر کی کہ وفاقی حکومت اس دیرینہ مطالبے پر سنجیدگی سے غور کرے گی جس سے بلوچستان کے عوام میں پائی جانے والی بے چینی اور محرومی کو دور کرنے میں مدد ملے گی۔