مسٹر پتلو کے پروگرام کے اجازت نامے کی اصل شرائط سامنے آگئیں، انتظامیہ کی غفلت پر سوالات

سیالکوٹ: فراز گراؤنڈ میں سوشل میڈیا شخصیت انصر جٹ عرف مسٹر پتلو کے پروگرام سے متعلق اجازت نامے کی شرائط سامنے آگئی ہیں، جن کے مطابق منتظمین کو محفلِ سماع منعقد کرنے کی اجازت دی گئی تھی، تاہم انعامات کی تقسیم کے لیے ہزاروں افراد جمع ہوگئے۔

ڈپٹی کمشنر اور ڈی پی او نے اجازت نامے کی شرائط اور حفاظتی انتظامات سے متعلق تفصیلات بتاتے ہوئے کہا کہ شہر میں امن و امان اور نظم و ضبط برقرار رکھنے کی بنیادی ذمہ داری پروگرام کے منتظمین پر عائد تھی۔

ڈی پی او کے مطابق اجازت نامے کی شرائط کے تحت منتظمین کو رضاکاروں یا نجی سکیورٹی کے ذریعے داخلی سکیورٹی یقینی بنانا تھی۔ اس کے علاوہ ہنگامی اخراج کے راستے کھلے اور ہر قسم کی رکاوٹ سے پاک رکھنا بھی منتظمین کی ذمہ داری تھی۔

دوسری جانب پولیس نے انصر جٹ عرف مسٹر پتلو کی گرفتاری کے لیے چھاپے مارنے شروع کر دیے ہیں۔ پولیس کے مطابق ملزم کی گرفتاری کے لیے کوششیں جاری ہیں۔

واضح رہے کہ چند روز قبل فراز گراؤنڈ میں محفلِ سماع کے دوران بھگدڑ مچنے سے دو افراد جاں بحق جبکہ متعدد زخمی ہوگئے تھے۔ واقعے کے بعد مسٹر پتلو سمیت دیگر افراد کے خلاف مقدمہ درج کیا گیا تھا