ایران کے جزیرہ قشم پر امریکی حملے کی خبر کے بعد عالمی منڈی میں خام تیل مہنگا ہوگیا

ایران کے جزیرہ قشم پر امریکی حملے کی خبر سامنے آنے کے بعد منگل کو ابتدائی کاروبار کے دوران عالمی منڈی میں خام تیل کی قیمتوں میں اضافہ ریکارڈ کیا گیا۔

پاکستانی وقت کے مطابق صبح 6 بج کر 4 منٹ پر برینٹ کروڈ کے مستقبل کے سودوں کی قیمت 48 سینٹ یعنی 0.5 فیصد اضافے کے بعد 105.25 ڈالر فی بیرل ہوگئی۔

اسی طرح امریکی خام تیل ویسٹ ٹیکساس انٹرمیڈیٹ (ڈبلیو ٹی آئی) کی قیمت بھی 47 سینٹ یا 0.5 فیصد اضافے سے 96.93 ڈالر فی بیرل تک پہنچ گئی۔

یہ اضافہ پیر کے روز تیل کی قیمتوں میں ہونے والی نمایاں کمی کے بعد سامنے آیا۔ پیر کو برینٹ کروڈ کی قیمت 8.66 ڈالر یعنی 7.63 فیصد کم ہوکر 104.77 ڈالر فی بیرل پر بند ہوئی تھی۔

جزیرہ قشم پر امریکی حملے کی خبر نے خطے میں کشیدگی اور تیل کی ترسیل سے متعلق خدشات کو دوبارہ بڑھا دیا ہے۔ آبنائے ہرمز عالمی سطح پر تیل کی ترسیل کی اہم گزرگاہ ہے، اس لیے خطے میں فوجی کشیدگی عالمی منڈی میں قیمتوں پر اثر انداز ہوسکتی ہے۔