اتحادی قیادت کے تعاون سے بلوچستان کی ترقی کا سفر تیز ہوگا،سرفراز بگٹی

وزیراعلی بلوچستان میر سرفراز بگٹی نے اتوار کو بلوچستان اسمبلی میں نئے مالی سال کے بجٹ کی منظوری کے بعد اپنے خطاب میں صدرِ مملکت آصف علی زرداری، چیئرمین پاکستان پیپلزپارٹی بلاول بھٹو زرداری، پاکستان مسلم لیگ(ن)کے قائد محمد نواز شریف اور وزیراعظم پاکستان محمد شہباز شریف کا خصوصی شکریہ ادا کیا ہے۔ انہوں نے کہا کہ اتحادی سیاسی قیادت کی جانب سے مسلسل رہنمائی اور تعاون کے مثبت اثرات صوبے کی ترقیاتی حکمت عملی اور عوامی فلاحی منصوبوں پر مرتب ہوئے ہیں۔وزیر اعلی بلوچستان نے اس موقع پر اس عزم کا اظہار کیا کہ وفاق اور صوبوں کے درمیان بہتر ہم آہنگی اور تعاون کے ذریعے پاکستان بالخصوص بلوچستان میں ترقی، استحکام اور خوشحالی کے سفر کو مزید تیز کیا جائے گا۔ انہوں نے مزید کہا کہ موجودہ سیاسی قیادت کی مشترکہ کاوشیں ملک کو درپیش چیلنجز سے نکالنے اور عوامی مسائل کے حل میں کلیدی کردار ادا کر رہی ہیں، اور صوبائی حکومت عوام کو ریلیف فراہم کرنے کے لیے پرعزم ہے