دادو کینال میں نہاتے ہوئے 6 سالہ بچہ ڈوب کر جاں بحق

نوڈیرو (رپورٹ: عابد بھٹو): نوڈیرو کے قریب گاؤں صابل جونیجو میں ایک افسوسناک واقعے کے دوران 6 سالہ کمسن بچہ نہر میں ڈوب کر جاں بحق ہوگیا۔

تفصیلات کے مطابق اعجاز احمد شیخ کا 6 سالہ بیٹا فرحان شیخ دادو کینال میں نہاتے ہوئے گہرے پانی میں چلا گیا اور ڈوب گیا۔ واقعے کی اطلاع ملتے ہی کیٹی ممتاز تھانے کی پولیس، مقامی دیہاتی اور ریسکیو 1122 کے غوطہ خور موقع پر پہنچ گئے۔

کافی تلاش کے بعد غوطہ خوروں نے بچے کی لاش نہر سے نکال کر ورثا کے حوالے کر دی۔ پولیس نے نوڈیرو گورنمنٹ اسپتال میں ضروری قانونی کارروائی مکمل کرنے کے بعد میت اہل خانہ کے سپرد کر دی۔

بچے کی میت گھر پہنچتے ہی کہرام مچ گیا، جبکہ اہل خانہ اور علاقے میں فضا سوگوار ہوگئی۔ واقعے پر اہل علاقہ نے گہرے دکھ اور افسوس کا اظہار کیا۔