مدارس کے طلباء کے جان و مال کا تحفظ ریاست کی ذمہ داری ہے، حافظ حمد اللہ

زیارت/سنجاوی( ) جمعیت علماء اسلام پاکستان کے مرکزی رہنما سینیٹر مولانا حافظ حمد اللہ نے مدرسہ نجم المدارس سنجاوی میں سالانہ دستارِ فضیلت کانفرنس سے خطاب کرتے ہوئے نال خضدار میں مدرسے کے معصوم طلباء پر پیش آنے والے المناک سانحے کی شدید مذمت کرتے ہوئے کہا ہے کہ نمازِ ظہر کی ادائیگی میں مصروف طلباء اور اساتذہ کو نشانہ بنانا انتہائی افسوسناک، قابلِ مذمت اور انسانیت سوز عمل ہے جس نے پوری قوم کو غم و اندوہ میں مبتلا کر دیا ہے۔ انہوں نے کہا کہ دینی مدارس علم، امن اور اخلاق کے مراکز ہیں اور وہاں زیر تعلیم معصوم طلباء کے جان و مال کا تحفظ ریاست کی ذمہ داری ہے۔ انہوں نے مطالبہ کیا کہ واقعے کی فوری، شفاف اور غیر جانبدارانہ تحقیقات کر کے حقائق عوام کے سامنے لائے جائیں، ذمہ دار عناصر کو قانون کے کٹہرے میں کھڑا کیا جائے، زخمی طلباء کے بہترین علاج کو یقینی بنایا جائے اور شہید طالب علم کے لواحقین سمیت متاثرہ خاندانوں کی مکمل داد رسی کی جائے۔ انہوں نے کہا کہ جمعیت علماء اسلام معصوم طلباء کے خون کو ہرگز فراموش نہیں کرے گی اور ان کے حقوق کے لیے ہر آئینی، قانونی اور جمہوری فورم پر آواز بلند کرتی رہے گی۔ مولانا حافظ حمد اللہ نے کہا کہ مدارس دینیہ ملک کی نظریاتی، دینی اور اخلاقی بنیادوں کے محافظ ہیں اور فارغ التحصیل علماء کو چاہیے کہ وہ معاشرے میں علم، اعتدال، اتحادِ امت، امن اور خدمتِ خلق کے فروغ کے لیے اپنا مؤثر کردار ادا کریں۔