خاتون ڈاکٹر پر تیزاب حملہ انسانیت سوز اور قابلِ نفرت جرم ہے، مولانا حافظ حمداللہ

سنجاوی ( ) جمعیت علماء اسلام کے مرکزی رہنما سابق سینیٹر مولانا حافظ حمداللہ نے کوئٹہ میں خاتون ڈاکٹر ماہ نور ناصر پر تیزاب پھینکنے کے دلخراش اور انسانیت سوز واقعے کی شدید مذمت کرتے ہوئے کہا ہے کہ یہ انتہائی افسوسناک، شرمناک اور قابلِ نفرت جرم ہے جس نے پورے معاشرے کو سوگوار کر دیا ہے، ایک گھنٹے کے اندر ملزم کا قتل کے پیچھے کیا محرکات ہیں ، اس حوالے سے حکومت بری الزمہ نہیں ہوسکتی ۔انہوں نے کہا کہ خواتین سمیت تمام شہریوں کے تحفظ کو یقینی بنانا ریاست کی زمہ داری ہے ۔ انہوں نے ڈاکٹر ماہ نور ناصر کی جلد و مکمل صحت یابی کے لیے دعا کی ان خیالات کا اظہار ضلع زیارت کی تحصیل سنجاوی میں مدرسہ عربیہ علی المرتضیٰ کے سالانہ دستارِ فضیلت کانفرنس سے خطاب کرتے ہوئے کیا۔ انہوں نے مزید کہا کہ دینی مدارس اسلام کی تعلیمات، اخلاقی تربیت اور قومی شعور کے فروغ کے اہم مراکز ہیں جنہوں نے ہر دور میں دین و ملت کی خدمت اور ملک کی نظریاتی بنیادوں کے استحکام میں کلیدی کردار ادا کیا ہے، مدارس کے خلاف منفی پروپیگنڈا کرنے والے عناصر اپنے عزائم میں ناکام رہیں گے کیونکہ علماء کرام اور دینی ادارے معاشرے کی فکری و اخلاقی رہنمائی کا فریضہ انجام دیتے رہیں گے۔