کوئٹہ سریاب روڈ میں مکمل شٹر ڈاؤن ہڑتال، بلوچستان بھر میں کاروباری مراکز بند

بلوچستان بھر کی طرح کوئٹہ کے علاقے سریاب روڈ میں بھی مکمل شٹر ڈاؤن ہڑتال کی گئی، جس کے باعث تمام چھوٹے بڑے کاروباری مراکز، بازار اور دکانیں بند رہیں۔

ہڑتال کے دوران سریاب روڈ، ہزار گنجی، بروری روڈ، قمبرانی روڈ اور شہر کے دیگر تجارتی علاقوں میں کاروباری سرگرمیاں معطل رہیں جبکہ ٹریفک کی روانی بھی معمول سے کم دیکھی گئی۔

تاجروں اور مختلف تنظیموں کی جانب سے ہڑتال کی کال پر کاروباری برادری نے بھرپور تعاون کرتے ہوئے دکانیں بند رکھیں۔ ہڑتال کے باعث روزمرہ خرید و فروخت متاثر ہوئی جبکہ شہریوں کو بھی مختلف مشکلات کا سامنا کرنا پڑا۔

مظاہرین اور تاجر رہنماؤں نے مطالبہ کیا کہ ان کے مسائل کو فوری طور پر حل کیا جائے اور متعلقہ حکام عوامی تحفظات دور کرنے کے لیے عملی اقدامات کریں۔

دوسری جانب امن و امان کی صورتحال برقرار رکھنے کے لیے مختلف علاقوں میں سیکیورٹی کے اضافی انتظامات کیے گئے تھے۔