اردو بولنے والی قوم کے حقوق کے لیے ہم ہر سطح پر ایک آواز ہیں، شبیر احمد صدیقی

سبی( نامہ نگار) اردو اسپیکنگ اقوام پاکستان کے رہنما شبیر احمد صدیقی نے اپنے ایک جاری کردہ بیان میں کہا ہے کہ ہم کسی بھی سیاسی جماعت، تنظیم یا پلیٹ فارم سے وابستہ ہوں لیکن جب بھی بات اردو بولنے والی قوم اور مہاجر قوم کے حقوق، تشخص اور مستقبل کی آئے گی تو ہم بلا تفریق ایک آواز ہو کر کھڑے ہوں گے انہوں نے کہا کہ اس حوالے سے ہم مہاجر قومی موومنٹ پاکستان کے چیئرمین آفاق احمد کے ساتھ شانہ بشانہ کھڑے ہیں اور ان کی طویل سیاسی و قومی جدوجہد کو خراجِ تحسین پیش کرتے ہیں۔شبیر احمد صدیقی نے کہا کہ آفاق احمد نے مشکل ترین حالات میں بھی مہاجر قوم کے پرچم، نظریے اور شناخت کو زندہ رکھا۔ ان کی ثابت قدمی، استقامت اور قوم سے وابستگی قابلِ ستائش ہے۔ یہی وجہ ہے کہ آج بھی جوق در جوق اردو بولنے والے افراد ان کی قیادت پر اعتماد کا اظہار کرتے ہوئے ان کے قافلے میں شامل ہو رہے ہیں۔انہوں نے مزید کہا کہ اردو اسپیکنگ قوم کے تمام افراد، چاہے ان کا تعلق کسی بھی سیاسی جماعت یا تنظیم سے ہو، انہیں قومی مفاد کے لیے متحد ہونا چاہیے۔ سیاسی وابستگیاں اپنی جگہ، لیکن جب قوم، شناخت اور حقوق کی بات آئے تو سب کو ایک پلیٹ فارم پر جمع ہو کر آواز بلند کرنی چاہیے۔
بیان کے اختتام پر شبیر احمد صدیقی نے کہا کہ ہم آفاق احمد کی جدوجہد، قربانیوں اور قومی خدمات کو سلام پیش کرتے ہیں اور امید کرتے ہیں کہ اردو بولنے والی قوم مزید اتحاد و اتفاق کا مظاہرہ کرتے ہوئے اپنے جائز حقوق کے حصول کے لیے بھرپور کردار ادا کرے گی