حج مشکل نہیں، سیلفیوں نے زیادہ تھکا دیا، وسیم اکرم

لاہور: قومی کرکٹ ٹیم کے سابق کپتان اور سوئنگ کے سلطان وسیم اکرم نے حج کے دوران پیش آنے والے اپنے تجربات اور مشکلات کے بارے میں دلچسپ گفتگو کی ہے۔

وسیم اکرم نے انسٹاگرام پر ایک ویڈیو شیئر کی، جس میں معروف ٹی وی میزبان فخر عالم نے انہیں حج اور عید کی مبارک باد پیش کی اور بطور ذیابیطس کے مریض درپیش چیلنجز کے بارے میں سوال کیا۔

اس موقع پر وسیم اکرم نے بتایا کہ وہ اپنی منجمد (فریز) انسولین ساتھ لے کر گئے تھے جو تقریباً 24 گھنٹے تک کارآمد رہتی ہے۔ ان کا کہنا تھا کہ حج انہیں مشکل نہیں لگا کیونکہ انسان عبادت کی نیت سے جاتا ہے اور ہر صاحبِ استطاعت مسلمان کیلئے زندگی میں ایک بار حج ادا کرنا ضروری ہے۔

سابق کپتان نے مسکراتے ہوئے کہا کہ حج کے دوران انہیں عبادات سے زیادہ سیلفیوں نے تھکا دیا۔ انہوں نے بتایا کہ منیٰ میں نماز سے فارغ ہونے کے بعد بھی متعدد افراد تصاویر بنوانے کیلئے ان کے منتظر ہوتے تھے۔

وسیم اکرم نے حج کو اپنی زندگی کا بہترین تجربہ قرار دیتے ہوئے کہا کہ انہوں نے دورانِ حج تمام مسلمانوں کیلئے خصوصی دعائیں کیں۔

واضح رہے کہ وسیم اکرم نے اس سال سابق قومی کپتان مصباح الحق اور معروف ٹی وی پریزنٹر فخر عالم کے ہمراہ فریضۂ حج ادا کیا۔