نوید عالم نے بطور ایس ایس پی پشین عہدے کا باقاعدہ چارج سنبھال لیا

پشین(نامہ نگار)پشین میں پاکستان پولیس سروس (PSP) کے افسر نوید عالم نے بطور سینئر سپرنٹنڈنٹ آف پولیس (ایس ایس پی) پشین اپنے عہدے کا باقاعدہ چارج سنبھال لیا۔چارج سنبھالنے کے فوراً بعد ایس ایس پی نوید عالم نے پولیس لائن پشین، مختلف برانچز اور اپنے دفتر کا تفصیلی دورہ کیا۔ اس موقع پر انہیں ضلع کی مجموعی امن و امان کی صورتحال، سیکیورٹی انتظامات، نفری، گشت، جرائم کی روک تھام اور جاری پولیس کارروائیوں سے متعلق بریفنگ دی گئی۔ایس ایس پی پشین نے پولیس افسران اور اہلکاروں سے گفتگو کرتے ہوئے کہا کہ عوام کے جان و مال کا تحفظ، جرائم پیشہ عناصر کے خلاف مؤثر کارروائیاں اور قانون کی بالادستی کا قیام پولیس کی اولین ذمہ داری ہے۔ انہوں نے ہدایت کی کہ تھانہ کلچر میں بہتری، عوامی شکایات کے فوری ازالے، میرٹ اور پیشہ ورانہ طرزِ عمل کو ہر صورت یقینی بنایا جائے۔انہوں نے کہا کہ پشین پولیس عوام کے تعاون سے امن و امان کے قیام، منشیات، جرائم اور دیگر غیر قانونی سرگرمیوں کے خاتمے کے لیے تمام دستیاب وسائل بروئے کار لائے گی۔ ایس ایس پی نوید عالم نے اس عزم کا اظہار کیا کہ شہریوں کو شفاف، ذمہ دار اور عوام دوست پولیسنگ کی فراہمی کے لیے مربوط حکمت عملی کے تحت اقدامات کیے جائیں گے