روٹ پرمٹس کا ریکارڈ جلد مکمل ڈیجیٹل کیا جائے، سیکریٹری پی ٹی اے

کوئٹہ: وزیراعلیٰ بلوچستان میر سرفراز بگٹی کے وژن کے مطابق اور ٹرانسپورٹ ڈیپارٹمنٹ کے زیرِ نگرانی پی ٹی اے کے ریکارڈ کی ڈیجیٹائزیشن کا عمل جاری ہے۔ اس کے حوالے سے سیکرٹری پی ٹی اے اور آئی ٹی ڈیپارٹمنٹ کے افسران کا ایک مشترکہ اجلاس منعقد ہوا۔
اجلاس میں آئی ٹی ڈیپارٹمنٹ کی جانب سے ڈیجیٹائزیشن کے عمل پر پیش رفت کے حوالے سے تفصیلی پریزنٹیشن دی گئی۔
اس دوران پی ٹی اے کے روٹ پرمٹس سے متعلق ڈیٹا انٹری کے مختلف پہلوؤں پر سیر حاصل گفتگو کی گئی اور ریکارڈ کو جدید خطوط پر استوار کرنے کے اقدامات پر غور کیا گیا۔
اس موقع پر سیکریٹری پی ٹی اے بلوچستان نے سافٹ ویئر انجینئرز کو ہدایت کی کہ سسٹم کو جلد از جلد مکمل طور پر فعال کیا جائے تاکہ روٹ پرمٹس کا ریکارڈ باقاعدہ سافٹ ویئر کے ذریعے ڈیجیٹائز کیا جا سکے اور ادارے کے امور میں بہتری لائی جا سکے۔