وزیراعظم شہباز شریف جلد سعودی عرب کے دورے پر روانہ ہوں گے

اسلام آباد: وزیراعظم شہباز شریف جلد سعودی عرب کا اہم دورہ کریں گے، جسے موجودہ علاقائی صورتحال کے تناظر میں غیر معمولی اہمیت دی جا رہی ہے۔

ذرائع کے مطابق یہ دورہ سعودی ولی عہد کی خصوصی دعوت پر طے پایا ہے، جبکہ اس کی حتمی تاریخ اور شیڈول مرتب کیا جا رہا ہے۔

سفارتی ذرائع کا کہنا ہے کہ یہ دورہ ایران اور امریکا کے درمیان حالیہ مذاکرات کے فوراً بعد ہو رہا ہے، جس کے باعث اس کی اہمیت مزید بڑھ گئی ہے۔

دورے کے دوران وزیراعظم شہباز شریف سعودی قیادت سے ملاقات کریں گے، جس میں مشرق وسطیٰ کی تازہ صورتحال، ایران امریکا تعلقات اور دیگر عالمی و علاقائی امور پر تفصیلی تبادلہ خیال کیا جائے گا۔

ذرائع کے مطابق وزیراعظم کا یہ دورہ آئندہ 48 گھنٹوں میں متوقع ہے، جس میں دونوں ممالک کے درمیان باہمی تعاون اور خطے میں امن و استحکام کے حوالے سے بھی اہم پیش رفت کا امکان ظاہر کیا جا رہا ہے۔