Header Layout

ڈی آئی خان: ہنگو کے تھانہ ٹل کے علاقے چھپری وزیرہ میں پولیو ڈیوٹی پر مامور پولیس موبائل پر نامعلوم دہشتگردوں کی فائرنگ کے نتیجے میں ایک اہلکار شہید جبکہ چار زخمی ہوگئے، جوابی کارروائی میں دو دہشتگرد ہلاک ہوگئے۔

ڈی پی او ہنگو کے مطابق پولیس نے فوری اور مؤثر جوابی فائرنگ کی، جس کے بعد مزید نفری طلب کر لی گئی، جبکہ علاقے میں فائرنگ کا تبادلہ کچھ دیر تک جاری رہا۔

پولیس حکام کے مطابق شہید ہونے والے اہلکار اسرار الحق کا تعلق شانگلہ سے تھا اور وہ پی ٹی سی مین انٹرمیڈیٹ کورس کر رہے تھے۔ زخمی اہلکاروں کو فوری طور پر قریبی اسپتال منتقل کر دیا گیا ہے، جبکہ واقعے کے بعد علاقے میں سیکیورٹی ہائی الرٹ کر دی گئی ہے۔

ڈی آئی جی کوہاٹ نے بتایا کہ فائرنگ کے بعد دو دہشتگردوں کی ہلاکت کی اطلاع ملی ہے، تاہم حملہ آور اپنے ساتھیوں کی لاشیں ساتھ لے جانے میں کامیاب ہوگئے۔

انہوں نے کہا کہ پولیس جوانوں نے بہادری کا مظاہرہ کرتے ہوئے دہشتگرد حملے کو ناکام بنایا، اور ایسے عناصر کو کسی صورت معاف نہیں کیا جائے گا۔

آر پی او کوہاٹ کا کہنا تھا کہ ہنگو میں پولیو مہم بلا تعطل جاری رہے گی اور دہشتگرد قوم کے حوصلے پست نہیں کر سکتے، سیکیورٹی فورسز دہشتگردوں کے مکمل خاتمے تک کارروائیاں جاری رکھیں گی۔

وزیراعلیٰ خیبر پختونخوا محمد سہیل آفریدی نے واقعے کا نوٹس لیتے ہوئے شدید مذمت کی اور آئی جی پولیس سے فوری رپورٹ طلب کر لی۔

ہنگو؛ پولیو ڈیوٹی پر مامور پولیس موبائل پر فائرنگ، اہلکار شہید، دو دہشتگرد ہلاک