اسلام آباد میں امریکا سے مذاکرات، ایرانی وفد کا پہلا بیان سامنے آگیا

اسلام آباد میں امریکا اور ایران کے درمیان ہونے والے مذاکرات کے بعد ایرانی وفد کا پہلا باضابطہ بیان سامنے آ گیا۔ ایرانی پارلیمنٹ کے اسپیکر اور مذاکراتی ٹیم کے سربراہ محمد باقر قالیباف نے کہا ہے کہ امریکا نے ایران کے مؤقف، منطق اور اصولوں کو سمجھ لیا ہے، تاہم اعتماد حاصل کرنے میں تاحال کامیاب نہیں ہو سکا۔

سوشل میڈیا پر جاری بیان میں باقر قالیباف نے مذاکراتی عمل کو آسان بنانے میں پاکستان کی کوششوں کو سراہا اور کہا کہ ایران نے نیک نیتی کے ساتھ مذاکرات میں حصہ لیا، مگر ماضی کے تجربات کے باعث مخالف فریق پر مکمل اعتماد ممکن نہیں۔

انہوں نے کہا کہ مذاکرات کے دوران ایرانی وفد نے مستقبل سے متعلق عملی اقدامات تجویز کیے، لیکن امریکا اس مرحلے پر ایران کا اعتماد جیتنے میں ناکام رہا۔ ان کا کہنا تھا کہ اب یہ امریکا پر منحصر ہے کہ وہ ایران کا اعتماد حاصل کرنے کے لیے سنجیدہ فیصلے کرے۔

باقر قالیباف نے مزید کہا کہ ایران اپنی قومی خودمختاری اور عوامی حقوق کے تحفظ کے لیے سفارتکاری کے ساتھ ساتھ دفاعی حکمت عملی کو بھی اہم سمجھتا ہے، اور قومی مفادات کے تحفظ کے لیے کوششیں جاری رہیں گی۔