جنگ بندی کیلئے پاکستان کی فعال ثالثی کی کوششوں کی حمایت کرتے ہیں، چینی وزارت خارجہ

بیجنگ (ویب ڈیسک): چینی وزارت خارجہ کے ترجمان نے پاکستان کی جانب سے جاری فعال سفارتی اور ثالثی کی کوششوں کی حمایت کا اعلان کرتے ہوئے کہا ہے کہ وہ خطے میں امن کے قیام کے لیے کی جانے والی تمام مثبت اقدامات کا خیر مقدم کرتا ہے۔

ترجمان کے مطابق، موجودہ صورتحال میں سفارتکاری اور مذاکرات ہی مسائل کا واحد مؤثر حل ہیں۔ چین پاکستان سمیت دیگر ممالک کی جانب سے کشیدگی کم کرنے اور تنازعات کے حل کے اقدامات کو سراہتا ہے اور ان کی مکمل حمایت کرتا ہے۔

بیان میں مزید کہا گیا کہ عالمی برادری کو چاہیے کہ وہ کشیدگی میں کمی کے لیے مشترکہ کردار ادا کرے اور ایسے اقدامات سے گریز کرے جو صورتحال کو مزید خراب کر سکتے ہیں۔

تجزیہ کاروں کے مطابق یہ موقف ایسے وقت میں سامنے آیا ہے جب مشرق وسطیٰ میں بڑھتی ہوئی کشیدگی کے باعث عالمی سطح پر جنگ بندی اور مذاکرات کی کوششیں تیز ہو گئی ہیں۔