بلوچستان میں اسلحہ رکھنے پر مکمل پابندی، ہر دہشت گرد کا پیچھا کیا جائے گا، ضیاء لانگو

کوئٹہ: صوبائی وزیر داخلہ میر ضیاء اللہ لانگو نے بلوچستان میں امن و امان کی صورتحال پر کسی قسم کے سمجھوتے سے انکار کرتے ہوئے کہا ہے کہ ریاست نے مستقل قیام امن کے لیے سخت اقدامات کر لیے ہیں۔

پیر کو سول سیکرٹریٹ کوئٹہ میں ایڈیشنل چیف سیکرٹری داخلہ محمد حمزہ شفقات اور معاون برائے وزیر داخلہ بابر یوسفزئی کے ہمراہ پریس کانفرنس کرتے ہوئے انہوں نے کہا کہ دہشت گردوں کے خلاف بلا امتیاز کارروائیاں جاری رہیں گی اور حکومت ہر دہشت گرد کے آخری ٹھکانے تک جائے گی۔ انہوں نے واضح کیا کہ شہریوں کے جان و مال کا تحفظ ریاست کی اولین ترجیح ہے۔

وزیر داخلہ نے اعلان کیا کہ وزیر اعلیٰ بلوچستان کی ہدایات کے مطابق صوبے میں ریاست اور ریاستی اداروں کے علاوہ کسی کو بھی اسلحہ رکھنے کی اجازت نہیں ہوگی، اور عوام کو ہتھیار رکھنے سے روکنے کے لیے باقاعدہ احکامات جاری کیے جا چکے ہیں۔