معیاری تعلیم کی فراہمی میں غفلت ہرگز برداشت نہیں ہوگی،ڈپٹی کمشنر سبی

سبی، ڈپٹی کمشنر سبی میجر(ر) الیاس کبزئی کی صدارت میں ڈسٹرکٹ ایجوکیشن گروپ کمیٹی کا اہم اجلاس منعقد ہوا جس میں ایس ایس پی سبی شاہنواز چاچڑ، اسسٹنٹ کمشنر بختیار آباد میر بہادر خان بنگلزئی، اسسٹنٹ کمشنر یوٹی انضمام قاسم، اسسٹنٹ کمشنر یوٹی ڈاکٹر حمزہ لاشاری، سینئر اکاو¿نٹس آفیسر میر گہرام لاشاری، ڈسٹرکٹ ایجوکیشن آفیسر عبدالستار لانگو، ڈسٹرکٹ مانیٹرنگ کوآرڈینیٹر آر ٹی ایس ایم مرزا اطہر بیگ، ڈی ڈی ای او میل طارق الماس، ڈی او ای فیمل اور ڈی ڈی ای او فیمل سمیت دیگر متعلقہ افسران نے شرکت کی۔ اجلاس میں ضلع بھر کے تعلیمی اداروں کی کارکردگی، اساتذہ کی حاضری اور تعلیمی معیار کا تفصیلی جائزہ لیا گیا۔ ڈسٹرکٹ مانیٹرنگ کوآرڈینیٹر آر ٹی ایس ایم نے بریفنگ دیتے ہوئے بتایا کہ گزشتہ تین ماہ کے دوران 282 دورے کیے گئے جن میں 39 اسکول بند پائے گئے۔ ڈپٹی کمشنر سبی میجر(ر) الیاس کبزئی نے اس صورتحال پر نارضگی کا اظہار کرتے ہوئے ہدایت جاری کی کہ جن اساتذہ کی عدم حاضری کے باعث اسکول بند پائے گئے، ان کی تنخواہوں سے 15 دن کی کٹوتی کی جائے اور ان کے خلاف مزید محکمانہ کارروائی بھی عمل میں لائی جائے۔ اجلاس میں ڈسٹرکٹ ایجوکیشن آفیسر عبدالستار لانگو نے بھی تعلیمی اداروں کی کارکردگی، درپیش مسائل اور بہتری کے لیے اٹھائے گئے اقدامات کے حوالے سے تفصیلی بریفنگ دی۔ ڈپٹی کمشنر نے ہدایت دی کہ تمام تعلیمی اداروں میں اساتذہ کی حاضری یقینی بنائی جائے اور تعلیمی سرگرمیوں کو فعال رکھا جائے۔ انہوں نے اس بات پر زور دیا کہ بچوں کو معیاری تعلیم کی فراہمی اولین ترجیح ہے اور اس سلسلے میں کسی بھی قسم کی غفلت برداشت نہیں کی جائے گی۔