پاکستان نے ایران پر حملوں کی مذمت، کشیدگی کم کرنے کا مطالبہ

پاکستان نے ایران پر حملوں کی مذمت، کشیدگی کم کرنے کا مطالبہ

اقوام متحدہ کی سلامتی کونسل کے اجلاس میں پاکستان کے مستقل مندوب عاصم افتخار نے مشرق وسطیٰ میں بڑھتی ہوئی کشیدگی پر گہری تشویش کا اظہار کرتے ہوئے ایران پر ہونے والے امریکی اور اسرائیلی حملوں کی مذمت کی ہے۔

سلامتی کونسل میں مشرق وسطیٰ کے بحران سے متعلق بحرین اور روس کی جانب سے پیش کی گئی قراردادوں کی حمایت کرتے ہوئے انہوں نے کہا کہ ایران پر حملوں نے نہ صرف خطے بلکہ عالمی امن اور استحکام کو بھی خطرے میں ڈال دیا ہے۔

ان کا کہنا تھا کہ پاکستان برادر ملک ایران کی سلامتی اور خودمختاری کی حمایت کرتا ہے اور کسی بھی ملک پر بلاجواز حملے پورے خطے کو ایک بڑے تنازع کی طرف دھکیل سکتے ہیں۔

عاصم افتخار نے خبردار کیا کہ حالیہ کشیدگی کے باعث شدید انسانی بحران پیدا ہونے کا خدشہ ہے۔ انہوں نے بتایا کہ متحدہ عرب امارات پر حملوں میں دو پاکستانی شہری جاں بحق ہوئے جبکہ خلیجی ممالک میں مقیم لاکھوں پاکستانی اس صورتحال سے متاثر ہو رہے ہیں۔

انہوں نے کہا کہ کشیدگی کے باعث تیل کی قیمتوں میں اضافہ ہوا ہے جس کے اثرات پوری دنیا پر پڑ رہے ہیں، جبکہ فضائی کارروائیوں میں خلل کے باعث ہوابازی کا شعبہ بھی متاثر ہو رہا ہے۔

پاکستانی مندوب نے کہا کہ میزائل اور بغیر پائلٹ طیاروں کے حملوں سے شہری آبادی اور املاک کو نقصان پہنچ رہا ہے جو بین الاقوامی قوانین کی خلاف ورزی ہے۔

ان کا کہنا تھا کہ اقوام متحدہ کے منشور سے ہٹ کر طاقت کا استعمال غیر قانونی ہے اور تمام فریقین پر بین الاقوامی انسانی قوانین کی پاسداری کی ذمہ داری عائد ہوتی ہے۔

انہوں نے زور دیا کہ مسائل کا حل طاقت کے استعمال میں نہیں بلکہ مذاکرات اور سفارتکاری میں ہے، اور اعتماد کی بحالی کے لیے تمام فریقین کو نیک نیتی کے ساتھ اقدامات کرنا ہوں گے۔

عاصم افتخار نے مزید کہا کہ کسی ایک ملک کو یہ حق حاصل نہیں کہ وہ خطے کے دیگر ممالک کو اپنی شرائط پر چلانے کی کوشش کرے۔

انہوں نے کہا کہ فلسطینی علاقوں اور عرب دنیا میں جاری کشیدگی بھی پورے خطے کو عدم استحکام کی طرف دھکیل رہی ہے۔

آخر میں انہوں نے کہا کہ تنازع کے حل کے لیے ثالثی کی کوششیں کرنے والے ممالک قابلِ تحسین ہیں اور پاکستانی قیادت اپنے پڑوسیوں، دوست ممالک اور شراکت داروں سے مسلسل رابطے میں ہے تاکہ کشیدگی کم کرنے میں اپنا کردار ادا کیا جا سکے۔