ایس ایس جی سی خراب گیس میٹر تبدیل کرے گی، حاجی نصیر لہڑی

ایس ایس جی سی کی جانب سے صارفین کی بلنگ شکایات کے ازالے کے لیے اقدامات، خراب میٹر تبدیل کیے جائیں گے، آئندہ ماہ بلنگ کے مسائل حل ہونے کی توقع ہے، حاجی نصیر لہڑی
کوئٹہ ،( پ ر)سوئی سدرن گیس کمپنی (ایس ایس جی سی) کے سینئر آفیسر حاجی نصیر لہڑی نے بلنگ کنٹرول انچارج عامر اویس سے ملاقات کی، جس میں صارفین کو درپیش بلنگ کے مسائل، زائد بلوں اور خراب گیس میٹروں کی تبدیلی سمیت دیگر امور پر تفصیلی تبادلہ خیال کیا گیا۔
اس موقع پر حاجی نصیر لہڑی نے کہا کہ نئے بلنگ نظام کے حوالے سے ابتدائی مسائل سامنے آرہے ہیں، تاہم ان کے حل کے لیے اقدامات کیے جا رہے ہیں۔ انہوں نے کہا کہ جن صارفین کے گیس میٹر خراب ہیں یا تبدیل کرنے کی ضرورت ہے، ان کے میٹر تبدیل کیے جائیں گے تاکہ صارفین کو درست بلنگ کی سہولت فراہم کی جاسکے۔
انہوں نے مزید کہا کہ عوامی شکایات کے ازالے کو ترجیح دی جا رہی ہے اور زائد و غلط بلنگ کے مسائل حل کرنے کے لیے عملی اقدامات جاری ہیں۔ ان شاء اللہ آئندہ ماہ تک بلنگ سے متعلق صارفین کی شکایات کافی حد تک ختم ہو جائیں گی اور عوام کو ریلیف فراہم کیا جائے گا۔