بلوچستان میں سیکیورٹی فورسز کی کارروائیاں جاری؛ فتنۃ الہندوستان کا دہشتگرد ہلاک

سیکیورٹی ذرائع کے مطابق بلوچستان میں جاری کارروائیوں کے دوران ضلع کیچ کے علاقے بولیدہ کے علاقے میناز میں انٹیلی جنس بنیادوں پر آپریشن کیا گیا، جس کے دوران ایک دہشت گرد مارا گیا۔

ذرائع کا کہنا ہے کہ دہشت گردوں نے دو خواتین کو اپنے ہمراہ لے جاتے ہوئے ناکہ بندی کی کوشش کی، جس پر سیکیورٹی فورسز نے فرار ہونے والے دہشت گردوں کا تعاقب کیا۔ اس دوران فائرنگ کا تبادلہ ہوا، جس کے نتیجے میں ایک دہشت گرد ہلاک ہوگیا۔

سیکیورٹی ذرائع کے مطابق ہلاک دہشت گرد کے قبضے سے اسلحہ اور گولہ بارود بھی برآمد ہوا ہے، جبکہ علاقے میں ممکنہ طور پر موجود دیگر دہشت گردوں کی تلاش اور خاتمے کے لیے کلیئرنس آپریشن جاری ہے۔

ذرائع کے مطابق بلوچستان میں دہشت گردوں کے خلاف کارروائیاں جاری رہیں گی۔