خیبر پختونخوا؛ تحریک انصاف حکومت میں ہونیوالی قانون سازی کا جائزہ لینے کا فیصلہ

خیبر پختونخوا حکومت نے تحریک انصاف کے دورِ اقتدار میں صوبائی اسمبلی سے منظور کیے گئے قوانین کی جانچ پڑتال کا فیصلہ کیا ہے، جس کے لیے محکمہ قانون نے خصوصی کمیٹی تشکیل دے دی ہے۔

کمیٹی صوبائی اسمبلی سے منظور ہونے والے 74 قوانین کا جائزہ لے گی اور آئندہ سات روز میں اپنی تفصیلی رپورٹ اور سفارشات اعلیٰ حکام کو پیش کرے گی، جس کی روشنی میں مستقبل کے لائحہ عمل کا تعین کیا جائے گا۔

جائزے میں 20 مختلف صوبائی محکموں، پراسیکیوشن، جامعات اور میڈیکل ٹیچنگ اداروں سے متعلق قانون سازی شامل ہوگی۔ اس کے علاوہ صوبائی اسمبلی کے ارکان کے اختیارات اور مراعات سے متعلق قوانین کا بھی جائزہ لیا جائے گا تاکہ قانونی خامیوں کی نشاندہی کرکے انہیں دور کیا جا سکے۔

مشیر اطلاعات خیبر پختونخوا ثمر ہارون بلور کے مطابق تحریک انصاف کے دورِ حکومت میں متعدد قوانین عجلت اور غیر شفاف طریقے سے منظور کیے گئے تھے۔ انہوں نے کہا کہ ایسے قوانین کا ازسرِنو جائزہ لینا اور ضروری اصلاحات کرنا حکومت کی اہم ترجیحات میں شامل ہے۔