مخالفین کا پروپیگنڈا ہمارے عزم کو متزلزل نہیں کرسکتا، مولانا عبدالرحمن رفیق

کوئٹہ ( )جمعیت علماء اسلام ضلع کوئٹہ کے امیر شیخ الحدیث مولانا عبدالرحمن رفیق، سیکرٹری جنرل حاجی عین اللہ شمس، سیکرٹری مالیات حاجی صالح محمد، ڈپٹی کوآرڈینیٹر ڈیجیٹل میڈیا حافظ رشید احمد حقانی، شیخ ماندہ یونٹ کے امیر مولانا محمد صادق، جنرل سیکرٹری سید حاجی امان اللہ آغا اور دیگر رہنماؤں نے کلی مسلم آباد، شیخ ماندہ میں گیس پریشر کی بہتری کے لیے نئی پائپ لائن کی افتتاحی تقریب سے خطاب کرتے ہوئے کہا کہ عوام کی بلاامتیاز خدمت جمعیت علماء اسلام کا نصب العین اور دینی و سیاسی جدوجہد کا بنیادی مقصد ہے۔انہوں نے کہا کہ جمعیت علماء اسلام کے رہنما اور کارکن ذاتی مفادات، خوف، لالچ اور نمود و نمائش سے بالاتر ہو کر محض رضائے الٰہی کے حصول اور ضرورت مندوں کی داد رسی کے لیے شب و روز مصروفِ عمل ہیں۔ عوامی مسائل کا حل اور بنیادی سہولیات کی فراہمی ہماری ترجیحات میں شامل ہے، اور اسی جذبے کے تحت جماعتی ذمہ داران عوام کو درپیش مشکلات کے ازالے کے لیے عملی اقدامات کر رہے ہیں۔ انہوں نے کہا کہ عوام کو بنیادی سہولیات کی فراہمی اور ان کے دیرینہ مسائل کا حل ہماری ترجیحات میں شامل ہے۔ جمعیت علماء اسلام دعوؤں کے بجائے عملی اقدامات پر یقین رکھتی ہے اور عوامی مشکلات کے ازالے کے لیے اپنی ذمہ داریاں ادا کرتی رہے گی۔ مخالف قوتوں کا جھوٹا پروپیگنڈا اور بہتان تراشی ہمارے عزم کو متزلزل نہیں کر سکتے ہم اخلاص، استقامت اور خدمتِ خلق کے جذبے کے ساتھ عوام کی خدمت کا سفر جاری رکھیں گے۔ انہوں نے کہا کہ موسمِ سرما کا آغاز ہو چکا ہے گیس کی لوڈشیڈنگ اور کم پریشر کے باعث عوام شدید مشکلات سے دوچار ہیں۔ حکومت اور متعلقہ گیس انتظامیہ عوامی مشکلات کا فوری نوٹس لیتے ہوئے گیس لوڈشیڈنگ کا خاتمہ اور گھریلو صارفین کو بلا تعطل گیس کی فراہمی یقینی بنائیں تاکہ سرد موسم میں شہریوں کو درپیش مشکلات کا ازالہ ہو سکے۔