کوئٹہ میں بجلی کی طویل لوڈشیڈنگ، شہری روزانہ 14 گھنٹے بجلی سے محروم

کوئٹہ: صوبائی دارالحکومت کے مختلف علاقوں میں بجلی کی طویل لوڈشیڈنگ نے شہریوں کی مشکلات میں اضافہ کر دیا ہے۔ نواں کلی اور گردونواح سمیت سریاب روڈ، مل کالونی، مشرقی بائی پاس، بروری روڈ، مغربی بائی پاس، ترین روڈ اور افغان روڈ کے علاقوں میں روزانہ 12 سے 14 گھنٹے تک بجلی کی بندش کی شکایات سامنے آ رہی ہیں۔

علاقہ مکینوں کے مطابق طویل لوڈشیڈنگ کے باعث معمولاتِ زندگی شدید متاثر ہو رہے ہیں، جبکہ گھریلو امور اور روزمرہ سرگرمیوں میں بھی مشکلات کا سامنا ہے۔ شہریوں کا کہنا ہے کہ بجلی کی مسلسل بندش نے ان کی پریشانیوں میں اضافہ کر دیا ہے، تاہم مسئلے کے حل کے لیے تاحال کوئی مؤثر اقدام نظر نہیں آ رہا۔

متاثرہ علاقوں کے رہائشیوں نے متعلقہ حکام سے مطالبہ کیا ہے کہ طویل اور غیر اعلانیہ لوڈشیڈنگ کا فوری نوٹس لیا جائے، غیر ضروری بجلی کی بندش ختم کی جائے اور شہریوں کو بلاتعطل بجلی کی فراہمی یقینی بنائی جائے۔