قلعہ عبداللہ میں امن و امان پر اہم اجلاس، کوئی سمجھوتہ نہیں ہوگا، وزیر داخلہ بلوچستان

کوئٹہ: صوبائی وزیر داخلہ میر ضیاء اللہ لانگو کی زیر صدارت ضلع قلعہ عبداللہ میں امن و امان کی صورتحال کا جائزہ لینے کے لیے اہم اجلاس منعقد ہوا، جس میں علاقے میں امن و امان برقرار رکھنے اور منشیات کے خاتمے سے متعلق امور پر تبادلہ خیال کیا گیا۔
اجلاس میں رکن صوبائی اسمبلی انجینئر زمرک خان اچکزئی، ایڈیشنل سیکرٹری داخلہ حمزہ شفقات، آئی جی جیل خانہ جات، ڈپٹی کمشنر قلعہ عبداللہ، ڈی پی او پشین خلیل بگٹی سمیت دیگر متعلقہ افسران نے شرکت کی۔
اجلاس کے دوران ضلع قلعہ عبداللہ میں امن و امان کی مجموعی صورتحال پر تفصیلی بریفنگ دی گئی اور علاقے میں امن برقرار رکھنے کے حوالے سے مختلف امور کا جائزہ لیا گیا۔
اس موقع پر وزیر داخلہ میر ضیاء اللہ لانگو نے کہا کہ صوبے میں امن و امان برقرار رکھنے کے معاملے پر کوئی سمجھوتہ نہیں کیا جائے گا۔ منشیات کا خاتمہ اور عوام کو پرامن ماحول فراہم کرنا حکومت کی ذمہ داری ہے۔
انہوں نے اس عزم کا اظہار کیا کہ عوام کے جان و مال کے تحفظ اور علاقے میں امن و امان کی صورتحال بہتر بنانے کے لیے متعلقہ ادارے اپنی ذمہ داریاں مؤثر انداز میں ادا کریں گے۔