کوئٹہ سے زاہدان کے لیے ایران ایئر کی پروازیں بحال، 92 مسافر روانہ

کوئٹہ: کوئٹہ انٹرنیشنل ایئرپورٹ سے ایران کے شہر زاہدان کے لیے ایران ایئر کی پروازیں دوبارہ بحال ہوگئیں۔ زاہدان سے آنے والی ایران ایئر کی پرواز IRA 0827 کوئٹہ ایئرپورٹ پر لینڈ کرنے کے بعد 92 مسافروں کو لے کر زاہدان کے لیے روانہ ہوگئی۔
کوئٹہ انٹرنیشنل ایئرپورٹ پر کوئٹہ چیمبر آف کامرس اینڈ انڈسٹری کے عہدیداران جنگیان بلوچ، سردار ایوب مریانی اور جمعہ خان بادیزئی، ایئرپورٹ منیجر خالد کاکڑ سمیت دیگر حکام نے ایران ایئر کی پرواز کے ذریعے آنے والے زاہدان چیمبر آف کامرس کے عہدیداران کا استقبال کیا۔
واضح رہے کہ کوئٹہ سے ایران کے شہروں مشہد اور زاہدان کے لیے پروازوں کا افتتاح دسمبر 2025 میں گورنر بلوچستان جعفر خان مندوخیل نے کیا تھا۔ تاہم بین الاقوامی حالات کے باعث یہ دوطرفہ پروازیں کچھ عرصے سے معطل تھیں، جو آج دوبارہ بحال ہوگئی ہیں۔
کوئٹہ سے مشہد اور زاہدان کے لیے پروازوں کی بحالی کو بلوچستان کی تاجر برادری اور عوام نے سراہا ہے۔ ان پروازوں سے دونوں ممالک کے درمیان تجارتی روابط، کاروباری سرگرمیوں اور عوامی آمدورفت کو فروغ ملنے کی توقع ہے۔