سردار شاہد لغاری پی او ای پی اے کی مرکزی مجلسِ عاملہ کے رکن منتخب

کراچی(نمائندہ خصوصی) سابق چیئرمین پاکستان ریڈ کریسنٹ سوسائٹی سردار شاہد لغاری پاکستان اوورسیز ایمپلائمنٹ پروموٹرز ایسوسی ایشن (POEPA) کی مرکزی مجلسِ عاملہ کے رکن کے طور پر دوبارہ منتخب ہو گئے ہیں۔
دوبارہ انتخاب پر ایسوسی ایشن کے چیئرمین اور سینئر اراکین نے سردار شاہد لغاری کو مبارک باد پیش کی اور ان کے لیے نیک تمناؤں کا اظہار کیا۔ تنظیم مغلیہ مرکز پاکستان کے عہدیداران،سیاسی وسماجی شخصیات مختلف مکاتب فکر کی جانب سے کامیابی پر مبارک باد دی گئی۔
سردار شاہد لغاری نے اس موقع پر پاکستان اوورسیز ایمپلائمنٹ پروموٹرز ایسوسی ایشن کے چیئرمین اور سینیئر اراکین کی جانب سے تعاون، حوصلہ افزائی اور اعتماد پر شکریہ ادا کیا۔ انہوں نے دوبارہ عہدہ ملنے والی مبارک باد اور نیک خواہشات کو اپنے لیے باعثِ اعزاز قرار دیتے ہوئے تمام احباب کا شکریہ ادا کرتے ہوئے انکا کہنا تھا کہ
دوبارہ انتخاب ان کے لیے اعزاز کے ساتھ ساتھ ایک اہم ذمہ داری بھی ہے۔ انہوں نے کہا کہ وہ ایسوسی ایشن کے اراکین کے اعتماد اور اپنے ساتھیوں کی حوصلہ افزائی کو قدر کی نگاہ سے دیکھتے ہیں۔ ان کے مطابق اجتماعی مشاورت، باہمی تعاون اور پیشہ ورانہ ذمہ داریوں کی ادائیگی کسی بھی تنظیم کی ترقی اور کامیابی کے بنیادی اصول ہیں۔
سردار شاہد لغاری نے کہا کہ وہ اپنی صلاحیتوں اور تجربے کو بروئے کار لاتے ہوئے ایسوسی ایشن کے مقاصد کے حصول، اراکین کے جائز مفادات کے تحفظ اور اوورسیز روزگار کے شعبے میں مثبت پیش رفت کے لیے اپنا کردار ادا کرنے کی کوشش کریں گے۔