پاکستان کی ریاض کے شاہ خالد انٹرنیشنل ایئرپورٹ پر حوثی ملیشیا کے گھناؤنے حملے کی شدید مذمت

اسلام آباد: پاکستان نے سعودی عرب کے دارالحکومت ریاض کے شاہ خالد انٹرنیشنل ایئرپورٹ پر حوثی ملیشیا کے مبینہ حملے کی شدید مذمت کرتے ہوئے اسے علاقائی امن و سلامتی کے لیے سنگین خطرہ قرار دیا ہے۔

وزیراعظم شہباز شریف نے سماجی رابطے کی ویب سائٹ ایکس پر اپنے بیان میں کہا کہ شہریوں اور اہم بنیادی ڈھانچے کو نشانہ بنانے والے حملے کسی صورت قابلِ قبول نہیں۔ ایسے واقعات علاقائی امن و استحکام کے لیے خطرہ ہیں اور بین الاقوامی قانون کی صریح خلاف ورزی کے زمرے میں آتے ہیں۔

وزیراعظم نے کہا کہ تشدد کے ایسے واقعات کا فوری خاتمہ ہونا چاہیے۔ پاکستان سعودی عرب کی خودمختاری، علاقائی سالمیت اور سلامتی کے لیے اپنے پختہ عزم کا اعادہ کرتا ہے۔

ترجمان دفتر خارجہ نے بھی ریاض ایئرپورٹ پر حملے کی مذمت کرتے ہوئے کہا کہ شہری ہوائی اڈے کو نشانہ بنانا ایک سنگین اور قابلِ مذمت اقدام ہے۔ ترجمان نے حملے میں جانی نقصان اور افراد کے زخمی ہونے کی اطلاعات پر گہری تشویش کا اظہار کیا۔

دفتر خارجہ کے مطابق شہری آبادی اور اہم بنیادی ڈھانچے کو مسلسل نشانہ بنانا ناقابلِ قبول ہے۔ عالمی برادری کو ایسے اقدامات کی واضح الفاظ میں مذمت کرنی چاہیے، جبکہ جارحانہ کارروائیوں کا کوئی جواز پیش نہیں کیا جا سکتا۔

ترجمان نے حوثی ملیشیا سے مطالبہ کیا کہ وہ ایسے حملے فوری طور پر بند کرے۔ پاکستان نے سعودی عرب کے ساتھ شانہ بشانہ کھڑے رہنے اور اس کی خودمختاری، سلامتی اور دفاع کے لیے اپنی حمایت جاری رکھنے کے عزم کا بھی اعادہ کیا۔